في عشقك يا وطن

جميله وحزينه
كأنك جبل
وأنا صبري فاض
وأصرخ الاقي
عنيكي لجام
يهذب جنوني
وأبكي تلمي
في كفوفك دموعي
وأعجب لصبرك
وأرفض خضوعك
وذلك وقهرك
وابص في عيونك
وقلبي سؤال
ليه السكوت
تردي عليا وراسك لفوق
سكوتي وصبري
حيلتي وسلاحي
يعجل نهاية عدوي
يزيد من غروره
يصدق غباءه
وتيجي النهايه
ويشرق نهاري
أنا مش ذليله
ولا غاويه قهر
ولادي ضعاف
وغموا عنيهم
ونسيوا الشرف
وباعوا الضمير
وأنا لسه صابره
وعندي أمل
فمين الضعيف؟؟
ومين الذليل؟؟
ويعصر سؤالك
في قلبي الألم
ويعجز لساني
وأشوف الحقيقه
وآخد قراري
يا اما اعيش بكرامه وشرف
يا اما مماتي يكون الشرف